ವರ್ಷ ಸ್ಪಂದನ...

ವರ್ಷ ಸ್ಪಂದನ...

ಮಳೆಯೆಂದರೆ......

ಬೆವೆತುಸಿರಿಗೆ ಸಿಂಚನ

ಸಂಧಿಯೊಳಗಿನ ರಿಂಗಣ

ಭಾವದ ಹನಿ ಚಿಲಿ ಪಿಲಿ

ಗಬ್ಬೆದ್ದ ಸ್ತರಕೆ ಮೋಕ್ಷ

ಕನಸು ಕಾಯಕದ ಮೊಳಕೆ

ಕಾಲ ಚಕ್ರದ ಗಾಲಿ

ಮಿಂಚಿನೊಳಗಿನ ತಂಪುಹಾಡು

ಕವಿಯಕ್ಷರ- ಪಗಡೆ

ಪ್ರೇಮದೊಳು ತುಸು ತಿಲ್ಲಾನ

ನಿರ್ಲಿಪ್ತತತೆಗೆ ಕಾಲ ಬದಲಾವಣಿ!!!!

ಮಳೆಯಿಂದ...........

ನೆಲ-ಬಾಳು ಹಸಿರಾಯ್ತು,

ಸೋರಿನೊಳು ನಗು ಉಕ್ಕಿ

ಹೊರದೇಹ ತಂಪಾಯ್ತು,ಕಣ್ಣು ಕೆಂಪಾಯ್ತು

ಹೊರಸೂಸೊ ಹನಿಹನಿ,

ಮನದೊಳು ಇಬ್ಬನಿ

ಮಂದಿಯೊಳು ಚಡಪಡಿಕೆ,ಇನ್ನೆಲ್ಲೋ ಗುದ್ದಾಟ

ಕುಸಿದ ಸೌಧ,ಮುಳುಗೊ ದೇಹದ ಬಯಕೆ

ಜರಿಸಾರಿ,ನಿಲುವಂಗಿ;ಮಡಚಿಟ್ಟ ಪುಸ್ತಕ

ಬದುಕಿನೊಳು ಭಾವ,ಭಾವ ಬದುಕಲ್ಲ

ಕಿಂಡಿಯೊಳಗಿನ ಹನಿ ಕೂಡ ದೊಡ್ಡ ಹಳ್ಳ!!!

ಓ ಮಳೆಯೇ.....

ಹೊಯ್ದು ಬಿಡು ಕೊಳೆತೊಳೆಯೇ..

ನೀನಾಗು ಕೈ ನೀಡೊ ಕರಸಿಂಚನ

ಕೊಳೆಯ ಮೂಲ ತಲುಪಲಿ ನೀರಬಳುಕು

ಬೆವೆತ ದೇಹದ ಉಸಿರಾಗು

ಕನಸ ಬೆಳೆಯುವ ಮನದ ಕಸುವಾಗು

ಹುಯ್ಯೋ ಹುಯ್ದು ಬಿಡು

ಕಣ್ಣೀರು ಕಾಣದಷ್ಟು

ಇತಿಹಾಸ ಉಳಿಯದಷ್ಟು!?

ರಚನೆ: ದಿನು